AFGRI Verhandeling het meesterooreenkomste vir sy kliënte en produsente van graan landswyd ingebring.

Die meesterooreenkomste vervang talle afsonderlike ooreenkomste met individuele produsente en kliënte. Die belangrike voordele wat dit bied is die standaardisering van kontrakbepalings en -voorwaardes tussen AFGRI Verhandeling en die party waarmee hulle besigheid doen en vinnige en doeltreffende omkeertye van kontrakadministrasietye. Wouter Mentz, Afgri Verhandeling en Logistiek se UH, sê, “Met ’n staande meesterooreenkoms hoef produsente en kliënte in die toekoms nie elke kontrak afsonderlik te onderteken nie. Individuele en ad-hoc-bevestigings sal deur middel van die telefoon, faks of e-pos gedoen word en die produsent of kliënt kan die bevestigingsmetode kies.

Die individuele kontrakte wat dié innovering vervang, is gewoonlik vyf bladsye elk, so die meesterooreenkoms sal ook tyd spaar en meer kostedoeltreffend as die huidige kontrakstelsel wees. Mentz is van mening dat die meesterooreenkoms deur Afgri Verhandeling se sakevennote verwelkom sal word aangesien dit wesenlike voordele sonder enige nadeel bied.

Ten einde die meesterooreenkoms so doeltreffend moontlik bekend te stel, stel Afgri Verhandeling dit aan die mark bekend deur ’n kompetisie vir produsente en kliënte.

Die kompetisie neem die vorm aan van ’n gelukkige trekking en deelnemers staan die kans om wonderlike Alva- en Cadac-gasbraaiers ter waarde van R40 000 te wen. Die eerste prys is die Alva Le Classique G615-braaier en die tweede prys is twee Alva Rosso G110-braaiers, en die vyf derde pryse is Cadac Patio Host Supreme-braaiers. Die kompetisie sal middel Oktober 2006 van stapel gestuur word en tot 15 Januarie 2007 duur en die trekking sal op 31 Januarie 2007 plaasvind.